PJESME - ELIZABETA HERCEG

"Utrka" Zdravko Šabarić

Nekoliko pjesama Elizabete Herceg, pjesnikinje

SOSED ROK
Beciklina sem se nafčila voziti,
Ali nesem znala z njega dole ziti,
Pak sem tak i poleg svoje hiže prešla
I soseda Roka malo dale našla.

"Primite me, strah me, nemrem doli stati"
Al' je čovek gluhi, nemreš ga dozvati.
"Grabu kopam", veli, "kaj bo voda tekla"
Ja sem mu još jempot, da me prime, rekla.

Dok je pital kam je mama me poslala,
Ja sem se kre njega dale otpelala.
I što zna do gda bi se vozila po selu
Da mi neje kotač zašel vu blato debelo.
KAK ČRLENI MAK
Kak drfteči črleni mak
Z kojega so zdavnja
Latice opale,
Još me k soncu vleču senje
Koje so me negda
K tebi zvale.

Med zrelim klasjem
Z zrnjem postiha
Na vetru zvoni.

Da bi otprl šaku
Videl bi na dlanu
Skrita
Kak črlena
Još latica spi.


JALŽA
I vezda se zmislim;
Još sem bila mala
Dok je stara Jalža
V hižu dojti znala.

Hodila je sama
Od sela do sela.
Vu njezinem culanjku
Bil je kruh i mela.

Od hiže do hiže
Prosila sirota,
Strplivna na stezi
Bogečkog života.

Al navek me z rokom
Pogladiti znala
I z žepa bombona
Zmusanoga dala.

Zela sem bombona
I rekla joj fala
Da ga nesem jela,
Ona neje znala.

Makar sem slatkoga
Jako želna bila,
Zmazanog bombona
NA dvor sem hitila.

Denes sega jega,
Samo fali ona,
Al se rada zmislim
Jalžinih bombona.

Morti bi jih rada
I sama pojela,
Ali rajši za me
Vu žep jih je dela.